Surat:હોટલમાં ગયા બાદ યુવતીને વાગ્યા ચાકુના ઘા:પોલીસે કરી યુવકની ધરપકડ
સુરતમાં આજે ખૂની ખેલ ખેલાતાં ખેલાતાં રહી ગયો હતો. સુરતના પુણા વિસ્તારમાં આવેલી એક હોટલમાં યુવકે યુવતીનું ગળુ કાપવાનો પ્રયાસ કર્યો હોવાનું સામે આવતાં ડરનો માહોલ સર્જાયો હતો. જો કે યુવતીને સારવાર માટે સ્મીમેર હોસ્પિટલમાં લઈ જવાઈ હતી. ત્યારે યુવકનું કહેવું છે કે, યુવતીએ જાતે જ ચપ્પુ માર્યું હતું જેથી પોલીસ અવઢવમાં મુકાઈ હતી પરંતુ ઘટનાની જાણકારી માટે યુવકની ધરપકડ કરીને વધુ તપાસ હાથ ધરી છે.
ઘટના અંગે મળતી માહિતી પ્રમાણે, સુરતના પર્વત પાટીયા ખાતે આવેલી એક હોટલના રૂમમાં એક યુવતી અને યુવક ગયા હતા તે દરમિયાન બૂમાબૂમના અવાજ આવી રહ્યાં હતાં. જેથી આસપાસના સ્ટાફ સહિતના લોકો ત્યાં દોડી આવ્યાં હતાં અને ત્યાંનું દ્રશ્ય જોઈને ચોંકી ગયા હતા. થોડીવાર અગાઉ હોટલના રુમમા યુવક સાથે ગયેલી યુવતીના ગળાના ભાગે ચપ્પુના ઘા હતા અને તેમાંથી લોહી વહી રહ્યું હતું. જો કે તેને તાત્કાલિક હોસ્પિટલમાં સારવાર અર્થે ખસેડવામાં આવી હતી. જ્યારે યુવકને પોલીસે ઝડપી લીધો હતો અને આ ઘટના અંગે વધુ પુછપરછ હાથ ધરી છે.
