Aravalli:વીજતાર અડી જતાં ટ્રકમાં આગ:3ના મોત, 150થી વધુ ઘેટાં-બકરાં ભડથું
અરવલ્લીના મોડાસાના બામણવાડ પાસે એક દુખદ ઘટના બની હતી જેમાં એક ટ્રકમાં ભીષણ આગ લાગતાં એક બાળક સહિત ત્રણના મોત થયા હતા. જ્યારે ટ્રકમાં ભરવામાં આવેલાં 150થી વધુ ઘેટા-બકરાં પણ સગીને રાખ થઈ ગયા હતા. આ કરુણ ઘટના અંગે માહિતી મળતાં જ મોડાસાની બે ફાયર ટીમે તાત્કાલિક ઘટનાસ્થળે પહોંચી આગ પર કાબૂ મેળવવાની કામગીરી હાથ ધરી હતી.
આ અંગે મળતી માહિતી મુજબ મોડાસા તાલુકાના શામળાજી હાઇવે પાસે આવેલા બામણવાડ ગામ પાસેથી ઘેટાં બકરાં ભરેલી એક ટ્રક પસાર થઈ રહી હતી. ત્યારે ટ્રક જીવંત વીજતારને અડકી જતા ટ્રકમાં એકાએક ભીષણ આગ ભભૂકી ઊઠી હતી અને આ આગમાં એક બાળક સહિત ત્રણ વ્યક્તિઓના મોત થયા હતા જયારે ટ્રકમાં રહેલાં 150 જેટલાં ઘેટાં-બકરાં પણ બળીને ભડથું થઈ ગયાં હતા. આ અંગે મોડાસા પોલીસ પણ ઘટનાસ્થળે પહોંચી હતી અને ઘટનાને લઈ તપાસ હાથ ધરી હતી.
