શમીના ઝાડથી શનિદેવને કરો પ્રસન્ન

હિન્દુ ધર્મમાં શનિવાર શનિદેવને સમર્પિત માનવામાં આવે છે. આ દિવસે શનિદેવને પ્રસન્ન કરવા માટે વિવિધ ઉપાયો કરવામાં આવે છે. જેનાથી શનિદેવ જલ્દી પ્રસન્ન થાય છે અને લોકો પર પોતાની કૃપા વરસાવે છે. કહેવાય છે કે, શનિવારના દિવસે શમીના વૃક્ષનું વાવેતર અને પૂજા કરવાથી શનિદેવની કૃપા બની રહે છે. અને પ્રકોપથી રક્ષણ મળે છે અને આ કારણે જ શમીના છોડને શનિદેવનો છોડ પણ કહેવામાં આવે છે. શનિવારે શનિના છોડની પૂજા કરવાથી કુંડળીમાં હાજર ગ્રહ નક્ષત્રોની સ્થિતિ પણ સારી બને છે.
શમી વૃક્ષનો સંબંધ પણ ભગવાન શિવ સાથે છે જેથી શમીના છોડની પૂજા કરવાથી શિવ અને શનિ બંનેની કૃપા પ્રાપ્ત થાય છે જેને કારણે દરેક સંકટમાંથી મુક્તિ મળે છે. જો તમારી આર્થિક સ્થિતિ ખૂબ જ ખરાબ ચાલી રહી છે તો શનિવારે ઘરમાં શમીનો છોડ લગાવો. તમે તેને મુખ્ય દરવાજાની જમણી બાજુએ પણ મૂકી શકો છો. એવું કહેવાય છે કે શનિવારે ઘરમાં શમીનું ઝાડ વાવવાથી ધન લાભ થવાની સંભાવના બને છે.

શમીના કેટલાક ઉપાયો

શનિવારે શમીના ઝાડની વિધિવત પૂજા કરીને પાંચ પાંદડા તોડીને ભગવાન શિવને અર્પણ કરો. આ પછી તેને તમારા પર્સમાં રાખવાથી પર્સમાં ક્યારેય પૈસાની કમી નહીં રહે.
શનિવારે શમીના ઝાડ નીચે સરસવના તેલનો દીવો પ્રગટાવવો ખૂબ જ શુભ માનવામાં આવે છે. આ ઉપાયથી શનિદેવની સાથે દેવી લક્ષ્મીની કૃપા પણ પ્રાપ્ત થાય છે અને ઘરમાં ધન-સંપત્તિ આવે છે.
શનિવારે સવારે ઉઠીને સ્નાન કર્યા પછી શમીના ઝાડના મૂળમાં એક સોપારી અને એક રૂપિયાનો સિક્કો અર્પિત કરો. આમ કરવાથી આર્થિક સંકટમાંથી મુક્તિ મળે છે. આ છોડના મૂળમાં કાળી અડદની દાળ ચઢાવવાથી કર્જમાંથી મુક્તિ મળે છે સાથે જ શનિની સાડાસાતી અને ઢૈયાથી મુક્તિ મળે છે.