સુરત જિલ્લામાં મતદાન અને મતગણતરીના દિવસે દારૂ વેચવા-પીરસવા પર પ્રતિબંધ

સુરત જિલ્લા કલેક્ટર આયુષ ઓકે ડ્રાય ડે જાહેર કર્યાંઃ તા. 29મી નવે.થી તા. 1લી ડિસે.ની સાંજ સુધી તેમજ તા. 8મી ડિસે.ના રોજ કોઈપણ પરમીટ શોપ, દુકાન, રેસ્ટોરન્ટ, હોટેલ, ક્લબ કે લાઈસન્સ ધરાવનાર કોઈપણ દારૂ વેચી કે પીરસી શકશે નહીં, હુકમનો ભંગ કરનારને સજા કરાશે

આગામી તા.૧લી ડિસેમ્બરના રોજ યોજાનારી વિધાનસભાની સમાન્ય ચુંટણી-૨૦૨૨માં મતદારો નિર્ભયપણે પોતાનો મતાધિકારનો ઉપયોગ કરી શકે, ઉમેદવારો કે રાજકીયપક્ષો દ્વારા મતદારોને પ્રલોભનરૂપે દારૂ તેમજ નશાયુકત પદાર્થ આપે નહી અને ચૂંટણીનું કામ નિષ્પક્ષ રીતે પાર પડે તેવા આશયથી સુરત જિલ્લા મેજિસ્ટ્રેટશ્રી આયુષ ઓકે એક જાહેરનામું પ્રસિધ્ધ કર્યું છે.
જાહેરનામા અનુસાર સુરત જિલ્લાના તમામ મતદાર વિભાગોમાં આવેલા દુકાન, હોટલ, રેસ્ટોરન્ટ, કલબ વગેરેને તથા કલબ, સ્ટાર હોટલ, રેસ્ટોરન્ટ અને હોટલ જેઓને દારૂ રાખવાનું અને પુરો પાડવાનું લાયસન્સ આપવામાં આવ્યું હોય, તેમજ વ્યકિતગત દારૂનો ઉપયોગ કે સંગ્રહ કરવા પરમીટ આપી હોય તેવી વ્યક્તિઓએ તા.૨૯/૧૧/૨૦૨૨ થી તા.૦૧/૧૨/૨૦૨૨ સાંજ સુધી તથા મતગણતરીના દિવસે એટલે કે તા.૦૮/૧૨/૨૦૨૨ના રોજ દારૂ વેચાણ કરવા/પીરસવા પર પ્રતિબંધ ફરમાવ્યો છે અને આ સમયગાળાને ‘ડ્રાય ડે’ તરીકે જાહેર કર્યો છે. જાહેરનામાનો ભંગ કરનાર શિક્ષાને પાત્ર થશે.